Ek Mulaqaat !!

Aj main Zindagi se mili

Pareshan thi , bheed men phasi thi ..uljhi uljhi si thi
Maathe pe uske lakeeren khichi thi mano keh rahi ho ki
Thak gayi hoon waqt se ladte ladte .
Saanse kuch fasi fasi si thi uski , shayd khul ke hasna chahti thi ..
Maine rokna chaha ussey par ruki nahi who ..
jaldi mein thi thoda ..phisalti chali gayi

usko yuh dekh ke aankh bhar aayi meri ..dam ghutne sa laga
mai ek gehri saans ki talash mein nikal padi.

Aaj mai Muhabbat se mili...

Muskuranyee woh mujhe dekh kar
Par aankho mein kahi koi dard chhupa tha ..
Shayad phir raat bhar woh soyee nahi thi !!

Chahre ki raunak kai sawalon mein kho gayi thi
Waqt se shayd kahi who bhi haar chuki.thi

Baar baar mujhe dekhti thi par khamosh ho jaati thi
Ansoo tham chuke the shayad ya sailab abhi aana tha.

Bas ek muskurat thi halki si mano keh rahi ho ki ..”khush rehna “
Uski is phiki muskurat ko mai dil mein dabaye aage badh gayee
Jawaab dene ke liye mere pass bhi kuch nahi tha kahi.

Soch mein doobe kadam mere kheech le gaye kahi
Nazar utha ke dekha to bachpan ki galiyon mein khud ko kahad paya.
Waqt bahut guzar chukka magar phir bhi, kuch bhi nahi badla tha wahan

Mai wahan YAAD se mili

Bahut khush thi .. chehak rahi thi
Kuch chhote bachho ke sang nange pairon se daud rahi thi

Mujhe dekh kar khilkhila ke hasee,
Boli ..aaj phir aa gayi tum mujhe dhoondte hue
Is taraf !
uski hasee uski aankhon tak pahuch rahi thi
maine pehli baar phir us din ghehri saans liya.
Maine yaad ko gale lagaya to palke nam ho chali meri.


Meri khushi ko dekh ke woh ekpal tak pujhe dekhti rahi
‘Boli saath hoon mai tumhare hamesha ‘
Lekin yeh bol ke phir un baccho ke peeche daud gayee.
Aur un galiyon mein lukka chhupi ke khel mein kho gayee.


Shaam ko lauti kamre mein to TANHAYEE intezaar kar rahi thi mera
Bas sirf uske pass hi hai waqt mere liye shayad
Maine ussey bataya apne is mulaqat ki dastan
Aur who khamosh ho kar sunti rahi mujhe ……